"Халăхăн ăс-тăнĕпе унăн мĕн пур тĕнче курăмне тăван чĕлхе чун парать. Тăван чĕлхесĕр чăн-чăн пĕлỹ çук",- тенě Аслǎ вěрентекенěмěр Иван Яковлевич Яковлев. Улăпла ăс-хакăл пулнă çак этемěн. 50 çул вăл хăй халăхне çутта туртнă, тата мěнле вăхăтра!
Чăваш халăхěн ǎсчахě, просветителě çуралнǎранпа 171 çул çитрě. 1992 çултанпа эпир çак паллǎ та нихçан манǎçми куна «Чǎваш чěлхи кунě» тесе уявлатпǎр, шкул, район е республика шайěнче иртекен тěрлě мероприятисене хутшǎнатпǎр.
Акǎ паян та, ака уйǎхěн 24-мěшěнче, чǎваш чěлхине чунтан парǎннǎ вěренекенсемпе вěрентекенсем районти «Янра, тǎван чěлхем!» уява пуçтарǎнчěç. Пирěн шкултан 5а тата 8б класра вěренекен Келлипе Ксения Мишина пěртǎвансем хǎйсен кěмěл сассипе «Туслǎ çемье» юрра шǎрантарчěç. 8а класра вěренекен Кошкина Карина вара тěнче шайěнче палǎрнǎ ентешěмěр Геннадий Айхи поэтǎн «Тупа» сǎввине янраттарчě. Пěчěк артистсем куракансене илěртÿллě чǎваш тумěпе, сцена çинче хǎйсене тытма пěлес ǎсталǎхěпе, çепěç те илемлě сассипе тěлěнтерчěç. Патăрьел район администрацийĕн вĕрентÿ, ҫамрăксен политикин, физкультурăпа спорт управленийĕ уява хутшǎннǎ ятпа пурне те тав турě, дипломсемпе чысларĕ.
Халǎхǎмǎршǎн чунтан-вартан тǎрǎшнǎ Аслǎ вěрентекенěмěр И.Я.Яковлев хǎйěн чун халалěнче тǎван чěлхене юратма, унпа вǎтанмасǎр калаçма вěрентсе хǎварнǎ. Апла пулсан, манар мар анне панǎ чěлхене! Çакǎ çутǎ тěнчере вǎл тата та уççǎнрах янǎратǎр!
М.И.Иванова