Чǎвашсен паллǎ художникě, вěрентекенě, профессорě А.Кокель çуралнǎранпа 140 çул çитрě. Вǎл - чǎвашран тухнǎ пěрремěш художник. Ун ěçěсене вырǎс художникě И.Е.Репин çÿллě шая хурса хакланǎ, мěн пур тěнчери куравсене те илсе çÿренě.
Март уйǎхěн 13-мěшěнче хамǎр ǎста ÿнерçе халалласа, Патǎрьел районěнчи Турхан ялěнче, «Кокель музей çурчě» уçǎлчě. Ку пысǎк пěлтерěшлě уява уçма Чǎваш Республикин пуçлǎхě Олег Николаев килсе çитрě. Унпа пěрле Патǎрьел район пуçлǎхě Р.Селиванов, Патшалǎх ларǎвěн председателě А.Аксаков, Чǎваш Республикин Патшалǎх Канашлǎвěн депутачěсем О.Мешков, К.Ермолаев, С.Семенов тата ыттисем те пулчěç.
Сумлǎ та хаклǎ хǎнасене кěтсе илме Патǎрьелěнчи 2-мěш вǎтам шкул вěрентекенěсемпе вěренекенěсем активлǎ хутшǎнчěç. Чи малтанах чǎваш халǎхěн авалхи йǎли-йěркипе пурнǎçне тата хальхи вǎхǎтри ěç-пуçа сǎнлакан выставка йěркелерěç, зала тěрлě экспонатсемпе илемлетрěç. Чăваш çыннин ӗçченлӗхне, илемлěхне сǎнлакан япаласем, кěнекесем, тěрě-эреш, тум-тир, ěç хатӗрӗсем, йывăçран тунă япаласем (савăт-сапа, сӗтел-пукан...) тата ыт. те çав тери курǎмлǎ та кǎсǎклǎ пулчěç.
«Пирӗн халăхăн çӗр пин сăмах, çӗр пин юрă, çӗр пин тӗрӗ»,- тенě аслă вӗрентекенӗмӗр Иван Яковлев. Çакна çирěплетсе чǎваш хěрěсемпе каччисем (вěрентекенсем) килнě хǎнасене илемлě юрǎ-ташǎпа савǎнтарчěç, авалхи тата хальхи пурнǎçǎн йěркипе паллаштарчěç. Çǎм арланине, кǎçатǎ çапнине, çǎпата тунине, сǎпка ǎсталанине, кантǎртан тăпачă çапса пир хатěрленине учительсем питě лайǎх кǎтартса пачěç.
Вěренекнсем ветерансене, килнě хǎнасене парнесем, чечек çыххисем парса хавхалантарчěç, кǎмǎлěсене çěклерěç.
Хǎнасене кěтсе илес тапхǎра шкул директорě Л.В.Лялина ертсе пычě, килнě хǎнасене çепěç чěлхепе саламларě, чǎвашǎн ырǎ йǎли-йěркипе паллаштарчě. Пурне те асаттесен пехилěпе, атте-анне çут пилěпе малашлǎха хǎюллǎн утма, чǎвашлǎха упрама чěнсе каларě. Вěçěнче «Пěрле - вместе!» сǎмах уйрǎммǎнах уçǎмлǎн янрарě.
М.И.Иванова